Bani masyarakat i belahan bumi bagian barat (Eropa, Amerika) pakon sebagian masyarakat Asia/Australia, panorang sekitar natal pakon taun baru i akhir Desember imanfaatkan do sebagai masa liburan (holiday seasons). Ai mase anggo pajuppah sidea biasani ihatahon sidea do “happy holiday”. Tontu tarbayang ma hita tene sonaha suasana liburan ni sidea, martuppu pakon ganupan anggota keluarga i rumah, sementara makanan-makanan khas liburan ihidangkon songon kalkun panggang, minuman susu campur telur (egnog), pnl. Sementara i darat ni rumah mulai ma turun salju anjaha lingkungan sekitar pe bottar ma taridah ibahen salju ai. Ibahen sidea ma masa liburan on sebagai intropeksi bani pardalanan goluh ni sidea sataun manipat, anjaha mampersiaphon diri mamasuki taun na baru.
Sonai ijai, beda homa i masyarakatta, terutama i Asia/Indonesia. Tontu halani i daerah tropis do hita, lang adong salju ijon. Paling ma suasana borgoh i musim parudan i bulan September-Februari. Secara umum homa masyarakatta lang adong mengenal kata “liburan”, halani marsampur do antara liburan pakon horja. Liburan do sambil marhorja anjaha marhorja do sambil liburan. Lang dong homa sipanganan na khusus ipangan sanggah musim liburan on. Untungma, deba masyarakatta martuppu do sanggah natal pakon tahun baru, sambil memanfaatkon momen ai sebagai acara keluarga, silahturahmi pakon acara gareja. I huta nami i Togur misalni, sada momen na paling berkesan setiap taun sanggah natal on ai ma makan bersama i gareja tgl 25 atap 26 Desember malam. Masing-masing keluarga mamboan indahan pakon minuman, sementara i gareja isadiahon lauk pauk berupa daging babi imasak lengkap (na idarohkon/cincang, pulur-pulur, na matah, sup, pnl). Margotong royong do homa patokkahon daging on. Sementara bani piga-piga keluarga, ibaen do acara keluarga bani malam pergantian ni tahun. Setiap anggota keluarga marsahap, padarathon unek-unek ni, mangindo maaf anjaha patugah kon rencana ni bani tahun na roh.
Hassipe lang boi mulak hu huta sanggah natal, isuha hon penulis do homa mulak hu huta bani tahun baru na salpu. Nini penulis i bagas uhur, hira-hira mar-holiday season ma homa on tene. Kebetulan, mulak do sebagian besar anggota keluarga besar nami na i perantauan, hassi pe dong do homa na lang boi mulak halani piga-piga alasan. Na mulak ai, dong ma ai mar-pesawat terbang, mar-bis, mar-travel, pnl. Masam-masam dalan tene, tapi das do ganupan i huta. Penulis sandiri, mulak hu huta tgl 31 malam naik pesawat Lion Air hun Bandara Soekarno Hatta, Jakarta. Das i Bandara Polinia, Medan sekitar jam 21:30. Langsung ma mar-taksi hu Lubuk Pakam. Ijai domma manjemput anggota keluarga, rup mar-kareta mulak hu Togur. Das I rumah jam 00:30, domma lewat masa pergantian taun. Agepe sonai, martuppu ma sakeluarga, martonggo, rup mangan lomang na malas, ikuahi sup gulei babi marbumbu lada, pakon ikan omas na iarsik. Dong homa oleh-oleh otik han Jakarta. Malas uhur. Dong homa deba lanjut bani acara pemuda i Balai Desa, Togur, das panorang pagi.
Pas bai taun baru tgl 1 Januari, marrohan ma anggota keluarga besar na legan. Sebagian, laho ma marminggu hu gareja. Halani jarang do manganhon gulei babi na pas daini i Jakarta, iputushon nami ma manayat 1 ekor babi baen pangan-panganan tumang. Igorbahon Makkela nami Saragih Simarmata (Pa-Japet) hun Marubun ampakon Panggian Purba Tambak (Pa-Erna) hun Togur, isayat sidea ma pinahan ai marborat sekitar 35 kg. Lengkap ma tongon imasak sidea: Idarohkon (tasak Silindung), ipanggang, pulur-pulur, namatah (na isikkami/hinasumba), sup, igulei pakei huning gorsing, pnl. Lang lupa homa daroh/gotah na imasak segar marbumbu, pakon bituha/atei-atei na ibolgang dob ai isayati. Rup mangan ma ganupan.
Sada na unik i Sumatera Utara, marrohan do anggota keluarga saling marsilahturami sanggah taun baru. Lengkap homa ihidanghon sipanganan songon lomang, dodol, kombang loyang, pnl. Hape anggo i daerah lain, sanggah natal do ibaen acara silahturami on, anggo taun baru pitah marlibur do hassa. Malas ma uhur pajuppah pakon marbuali sesama anggota keluarag besar pakon family ampa hasoman sahuta.
Ari-ari berikutni, marmulakan ma anggota keluarga hu perantauanni bei. Tgl 4 Januari, mulak ma homa penulis hu Jakarta, mar-kapal laut KM. Kelud ni PELNI via Pelabuhan Belawan menuju Pelabuhan Tanjung Priok, Jakarta. Ulaki marhorja bani taun na baru on dengan semangat na baru. Semoga torsa mardalan taun on anjaha boi homa ulaki mar-libur I akhir taun. Happy holiday. MP
Keterangan ni foto: Manayat pinahan i alaman ni rumah i Togur
