Songon na domma ibaritahon hinan, boritan do sada boru ni Sigumonrong, Esni br Purba mulai bulan November 2009 na salpu. Nini dokter namanambari, mengalami stroke do gan amboru on.
Ibagas rencana ni Tuhanta, domma marujung goluh amboru ai anjaha mulak hu lambung ni Tuhan, bani ari Kamis pagi tanggal 20 Mei 2010 nasalpu, i Togur. Dob hussi ibaen acara keluarga pakon gareja, isuan ma i sore ni i Pargambirian Topi Pasar, Togur. Sedih do salian keluarga, mangingat bahat kenangan na itadikkon amboru on, sonai homa perjuangan hidupni age sanggah sehat hinan, rossi sanggah boritan.
Esni br Purba on aima boru ni Bapa Alm Ev. Pardamen Purba/Inang br Sipayung ondi (hun Galang) anjaha botou ni Bapa St. Johannes Purba/Inang br Saragih. Sanggah marujung goluh ia, lape dong marhajabuan. Ia manadinghon 2 botou dalahi anjaha 2 saninan naboru, piga-piga keponakan (parmaen, niombah) anjaha 3 pahoppu humbani keponakan. Tonggohon hita me keluarga na itadinghonni. Juli Purba, Togur.
