Anggo porini lang dear pangahap lalap, sial, gagal, boritan, dong do sada budaya ni Simalungun na gabe penangkalni. Jadi anggo sihol halak Simalungun buang sial ase roh keadaan nabaru, mittor do idalanhon sidea on. Goranni : maranggir uttei mukkur.
Marranggir atap marpangir nini i Toba, aima maridi ipassur mamakei uttei mukkur. Uttei mukkur (jeruk purut, ibagas Bahasa Latin iatahon Citrus × hystrix DC.) aima sada uttei namorum tumang. Bona ni marduri, bulungni terdiri 2 bagian songon angka no 8, anjaga buah ni marlukluk atap berkerut, ai do ase iatahon jeruk purut. Buahni on migar do anjaha lang tarpangan, tapi morum anjaha landit (lendir) nai do na ibuat. Songon jolma, iatahon do homa dong do uttei dalahi (juttul bai ihurni) pakon uttei naboru (tapak bai ihurni). Dong do homa jolma na mandarami uttei si sada-sada, si tolu-tolu atap si lima-lima sattakei na ipakei maranggir ai. Lang ibotoh hita latar belakangni.
Dob hussi ibuat uttei mukkur ai, ibolah opat ma. Sipata itambakon kosaya, bawang merah pakon huning gorsing. Laho ma hubah passur, maridi ma, anjaha sanggah maridi ai idugushon (digosokkan) ma uttei mukkur ai pakon batuni bani ganup badan, humbai ulu das hubanei nahei. Sanggah maridi ai, ipikkirhon anjaha ihatahon ma aha sihol ni uhur diri, anjaha porsaya diri, juppah ma holi ai.
Sonaha do mamporsayai ai secara ilmiah pakon theologis ? Mungkin harus mulak do hita tene hu sejarah sapari sanggah lape masuk agama hu Tanoh Simalungun. Jolma namarpambotoh (datu) do guru, anjaha sidea do namangajarhon pasal na maranggir on ra hinan. Hubanta jolma na modern, boi do ianggap hita on sebagai suggesti (pemberi semangat namembere hasil na dear secara tidak langsung). Marhitei na maranggir hita, porsaya hita hubani Tuhanta, malas uhur anja rajin marhorja, pasti do sura-sura boi idapothon. Sedo halani nalegan-legan.
Isampingni ai, boi do homa sada bisnis ra uttei mukkur on i huta. Hinan, dong do piga-piga bona ni uttei mukkur ni St Johannes Purba i Togur. Lang pala napangindo, marsitadingkon duit ni bei do jolma anggo mambuat buahni ai laho maranggir, martambar atap marjarah. Lumayan, boi gabe uang jajan ni niombah na manjaga rumah. MP.
