Demban (Sirih, ibagas Bahasa Latin iatahon Piper betle L.) aima tumbuhan namanjulur (merambat) bai bona ni hayu. Bulungni siratah do rupani nassa bolak ni tangan. Anggo ipangan bulungni ai daini migar masapot. Batta i Simalungun, bahat do salian manfaat ni bulung ni demban on. On ma piga-piga manfaat :
1. Mardemban (Mengunyah Daun Sirih)
Songon halakan bapa namangissop, nasi Inang biasani mardemban do i huta. Anggo dong panorang natenang sanggah massaran, mittor mardemban do sidea. Nini jolma simbuei, dong do piga-piga kegunaan ni na mardemban ai : mambahen babah/pamanganta segar, pasehathon ipon, pakon nalain-lain.
Paima mardemban, iattupi ma lobei demban ai. Ibaen ma gambir, pining pakon kapur, anggo dong buah ni cengkeh nakorah itamahon homa. Ganupan bahan-bahan ai tuppu do ibaen i bagas bajut. Sanggah mardemban ai, deba nasi Inang marsuttil do (mangossop timbahou). Khusus bani Oppung na lang dear be ipon ni, ibaen ma duda-duda ni, ihalushon lobei demban ai ase boi iharat sidea. Mambere duda-duda on pe marhitei mambaen horja adat naetek do biasani.
Secara ilmiah, porlu do iteliti piga-piga kerugian ni zat na marbahaya bai attup ni demban ai, songon zat kapur pakon nikotin ni timbahou.
2. Demban Sayur
Anggo dong nasihol sipamasaon songon nalaho pesta marhajabuan, ontangan/undangan i Simalungun ipadas marhitei demban do. Ibaen demban na domma iattupi ibagas bajut, anjaha irohi tiap tangga/rumah makkatahon undangan ai marhitei namanurdukkon demban ai. Sonari, bahatanma undangan ipadas marhitei surat undangan.
Sanggah mardalan pesta ai, bahat do acara manurdukkon demban sayur. Piga-piga diantarani aima sanggah mangalo-ngalo tondong, sanina pakon boru; dob salpu mangan, anjaha sanggah padashon batu ni demban boli ni boru.
3. Mamupus
Anggo boritan dakdanak i huta, songon mangat-mangat (demam), biasani ipupusdo. Mamupus aima mambursikkon/manapui akkula ni dakdanak ai bani demban na domma iattupi dob hossi iharati. Sipata itambah do jarangou. Bai jolma sapari, ibasahon jolma namarpambotoh do lobei piga -piga ayat tertentu bai demban ai.
I harangan, bahat do bulung-bulung na mirip songon demban on, aima gatap (boi do ipangan) pakon siangir (lang boi ipangan). Ibagas rahutan do biasani demban ijual i tiga.
Anggap hita ma demban on Lemon C atap Pagoda Pastiles. MP.
