Hira-hira tahun 2005 pangangguran do hanami tolu halak humbani keluarga ni St Zakaria Purba ondi i Marubun Lokkung : dua sarjana pakon sada tamat SMA. Tolusi hanami manderes rambung. Si Herna anggi nami lang pala ongga manganggur halani mintor dapot ni do parhonoran ni i SD Inpres Marubun Lokkung. Si Ratna tikki ai domma horja i Jakarta. Halani pengangguran ai niombah ni Voorhanger (GKPS Marubun Lokkung) jadi parsahapan ni na deba do ai i kodei. "Aha ma gunani sarjana anggo mulak do hu huta" nini deba jolma simbuei, hassi pe pangahap nami dassa ra ai.
Tikki ai bahatan bois do panorang nami sekeluarga i juma. Tapi anggo panorang ni ma partonggoan ya misir partonggoan do hanami sekeluarga. Panorang ni marmingggu ya marminggu. Panorang ni marpesta ya marpesta. Bingung do ra parhutatta mangidah hanami halani seng sai mandolei hanami. Padahal bapa pakon inang pe tikki ai dihut do manderes. Manggantung homa. Si Tri (Kudeng) pe dihut do manggantung. Kaha br Marbun pe dihut manggantung. Luar biasa, kaha on tubuh anjaha marbanggal i Medan (anak Medan do ia) tapi boi lincah manggantung! Si Aswin tikki ai marumur hira-hira 2 tahun. Ia pe dihut do hu panderesan. Gati-gati ma ia iharat rongit. Si Bita sikolah TK i Sumbul Sidikalang i huta ni oppungni, aima Tulang Marbun par Helvetia. Bapa domma pensiun (kepala sekolah SD Inpress 094118) homa tikki ai.
Tapi age pe sonai sai malas do uhur nami. Sai manggoluh do tong pengharapan nami hubani Tuhan : Bani panorangNi sai dear do holi ganupan ibahen Tuhan. Biasa do hanami mangan siang i juma toruh rambung (simpang dalan hu Batuholing). Bulung gadung do loppah nami pakon ikan asin do ikan nami tapi malas tumang do uhur nami ganup. Boi do hanami mokkor modom anjaha mandoding i toruh rambung. Luar biasa do tongon pasu-pasu ni Tuhanta!
I toruh rambung ai mararih ma hanami sakeluarga, ase gotong-royong ma hanami manrambas halani halong ma mulai rambung ai. Halani ai porlu ma bannami parang putor pala piga-piga. Jadi, irencanahon nami ma mamboli parang ai hu Tiga Juhar halani jenges-jenges gan parang ijai anjaha lang sai mahol. Bani ari Rabu misir ma hanami tolu halak (bapa, Jhonni & Hendra) mardalan nahei hu Tiga Juhar via Jumasaran, Parsikkean. Han Parsikkean naik motor hu Tiga Juhar. Das hossi i Tiga mittor parpanggang ma hanami, mangan panggang Karo. Malas uhur! halani domma ngayotan mardalan nahei han Marubun-bah Topu-Siporkas-bah Guyap-Jumasaran-bah Buaya-proyek ni Sinuraya-baru pe Parsikkean. Salpu mangan baru manorihi parang. Jenges-jenges do tongon. Lanjar iboli abang Jhonni do homa sada gupak na jenges.
Sambil mardalani i Tiga ai iboli nami ma sipanganon (snack), aqua, pakon buah-buahan. Misir ma hanami marmotor (angkutan pedesaan) hu Parsikkean. Han Parsikkean ulakkon mardalan nahei mulak hu Marubun. I tongah dalan ipangani nami ma deba siluah ondi. Dong buah markisa. Hulit ni ai igijikkon nami hu bah Buaya. Hahha! Das i Jumasaran longang sidea halani iidah sidea hanami rap mardalan nahei ai. I tongah dalan i Jumasaran dohor panimbunan/kuburan ihatahon bapa ondi do sonon : "Au do mangubur (maragenda) sidea in piga-piga". "Ingat udan ma hanami safari hu panimbuann on" nini bapa ondi hu bannami na dua. Terkenang bapa tikki voorhanger pe ia. Dong do memang na markreta (sepeda motor) tikki ai han Marubun hu Tiga Juhar, na si kaka Densi misalni, tapi sambor do dalan, mardalis-dalis. Anggo lang somal songon par Jumasaran boi do dalis hu lombang, hu bah Guyap atap bah Buaya. Hira-hira jam 5 bod ari ma nami ai das i Marubun. Malas uhur!
Refleksi :
a. Sai lambin dear do magira dalan han Marubun hu Parsikkean/Tiga Juhar.
b. Ingat-ingat/nostalgia na arga do pardalanan nami on.
c. On ma panorang parpudi hanami na tolu mardalan nahei i atas tanoh on. Tapi yakin do au na rup mardalan do tong hita i atas tanoh on pakon sidea na domma parlobei marujung goluh. Nitta do bani Pengakuan Iman Rasuli : "... Aku percaya kepada Roh Kudus; gereja yang kudus dan am; persekutuan orang kudus". Mudah-mudahan bani panorang ni mardalan nahei ma homa au pakon abang Jhonni, abang Annis, Aswin, Pado, Mikael, Juli, Akim, Advice, Adi, Abang Panus, pnl. Sidea boru pe boi do dihut. Hita usahahon do keluargatta lang bias gender. Kaka Esni pe boi do dihut. Posma Ridho, Japet, Jui, Budi, Hillary, Inge, si Mitra pe boi do dihut. Hahaha!
d. Ija do Tuhan tikki manganggur hanami i hutatta? Ai seng marpambahenan Ia dompak hanami be? Lang sonai! Bapa pakon inang do citra ni Naibata bannami tikki ai. Berjuang do Tuhan paluahkon hanami humbani pangangguran marhitei rencana-rencana na lang putus asa i tongah-tongah ni keluarga. Tuhan memperjuangkan nasib orang-orang yang menderita dan tetap berseru-seru, berharap dan percaya kepada-Nya!
Hita usahahon ase adil gender. Semoga Tuhan memberkati keluarga besarta! Amen.
