Salah sada jenis makanan na unik na dong i Simalungun dassa aima nitak. Nitak aima topung matah isampur gula merah pakon kelapa gongseng. Halani matah do topung atap boras ai ipangan, gati do jolma mabiar manganhon nitak on. Tapi anggo ipangan hussi, enak do salian daini.
Boras na ipilih mambaen nitak on aima boras kelas sada nadear songon si ramos pakon si gambiri. Ironjam ma lobei bai baskom boras on sampei momo. Momo hussi, iduda ma bai losung. Sangga manduda on, biasani itambahkon do lada, ase morum holi. Isisihkon ma otik topung on mambaen nitak nabottar holi.
Ikuhur ma homa kalapa, baru isaok sampai si cokelat rupani, tapi ulang mossong. Gula merah itupiki mamakei pisou. Baru idudaa kalapa saok on isampur pakon gula, sampei marsampur dear. Dob ai, ipamasuk ma topung nokkan, iduda sampai marsampur haganupan anjaha rupani jadi sigorsingma anjaha lokkot ma adonan ai. Anggo domma dear, itopa ma adonan ai datar padat bai losung ai. Dob ai, marhitei sada dudaan na sedang, pas ibaen itongah-tongah ni adonan ai, iposahma adonan ai, itupiki hira-hira 3x4 cm baggalni. Dong do homa naitambahi longa sanggah manduda nitak ai.
Dob ai ikuhurma sakkibul nari halambir/kelapa, anjaha iaguma ibagas losung pakon sisa topung nokkan anjha itopa ma homa songon nitak ai. Jadi ma nitak sibottar.
Isususn ma nitak on ibagas pinggan, itambahkon piga-piga telur ayam na irebus, pakon galuh si minak. Dear rupani ibagas pinggan ai, kuning marsampur putih.
I Simalaungun, isurdukkon do homa nitak on jadi siluah, iatahaonma nitak siang-siang. Biasani ibaen sanggah mamasuki rumah baru, manrabi, pakon hubani ma lulus sikolah. Parmaen nabaru roh pe wajib do manduaa nitak bani ari pertama dob hussi pesta pamasu-masuan, anjaha rupma sekeluarga manganhon nitak ni parmanen on. MP.
