Halani bosan mando tong bai panganan sehari-hari (agepe bersyukur pe namin boi dope mangan 3 hali sadari tene), anggo baru gajian atap pe anggo adong na marulang tahun mittor dong do usulan humbani kawan-kawan i kator ase laho mangan hu luar. Ase ganti suasana, nini.
I antara bahat pilihan i kota, salah sada rumah makan sasaran aima Restoran Cina (maaf, lang na-rasisme). Dai-ni sosok bai dilah, pas bumbuni, porsini bahat, harga tarjangkau anjaha lang pala dokah paimahon. Salah sada restorat naterkenal i Jakarta aima Restoran Angke, i sekitar Jalan Gajah Mada, Jakarta Pusat.
Hundul hussi, mittor ipindo hasoman-hasoman naboru ma buku menu. Naparlobei ipesan aima minuman, teh asli cina na tawar lang margula (ocha hangat). Ibere pelayan ma homa assimun acar halilian paima roh panganan. Tos (bersulang) ma lobei, cheers, irik iatahon "untuk sianu". Dob ai rohma sup, 1 mangkuk etek sahalak. Sup on boi sup jagul, perut ikan atap asparagus.
Halani dong namarulang taun, mittor roh ma mi ulang tahun na dong tolur ni puyuh marwarna-warni ibaen. Harapanni, ase ganjang umurta songon mi ai, anjaha berwarna-warni na jenges homa goluhta songon tolur ai. Ibagihon ma indahan bai mangkuk etek-etek sahalak. Lauk pertama rohma bollut (belut) na igoreng kering pakon sayur sawi. Enak, marappok salian lang marbau. Roh ma homa sotong (cumi-cumi) goreng mentega, pakon manuk (ayam) na irebus/bolgang tumang tapi margaram. Agepe i rebus do hassa, tapi enak salian. Marsumpit (penjepit atap gappit-gappit) do ijopopputi panganan on. Tahu bulat naikuahkon pe roh do. Terakhir, roh ma ikan gurami na igoreng (ibolah). Anggo lang dong parsubang, ikan guramion boi igattihkon bai daging babi goreng. Paima mulak, ibere sidea ma buah sampur, semangka pakon ambotik (pepaya). Panganan ai ganup ibaen bai meja na boi iputar daun meja ni happit atas, ase murah setiap namangan ai mambuat sipanganan.
Sanggah idalan, marangan-angan do pikkiran. Bahat do gatni bahan-bahan na i huta ai na boi ioalah gabe masakan Cina na lezat, anjaha boi ijual. Buluh ta pe bahat do, boi mambaen sumpit anjaha meja na marputar ai boi do ibaen humbani hayu na dong i huta. Pasti boi do holi ai. MP.
